ການສ້າງຕັ້ງ ມູນນິທິ ມະຫາ ສິລາ ວີຣະວົງສ໌ ແມ່ນໃນສະພາບເງື່ອນໄຂ ທີ່ມີຄວາມສໍາຄັນ ແລະ ຈໍາເປັນຕໍ່ວຽກງານ ການສຶກສາ ແລະວັດທະນະທໍາ ເພື່ອເຮັດໃຫ້ການຄົ້ນຄວ້າທາງດ້ານພາສາ ວັນນະຄະດີ ປະຫວັດສາດ ແລະ  ວັດທະນະທໍາ ຮີດຄອງປະເພນີ ອັນດີງາມຂອງຊາດລາວ ມີການພັດທະນາໃຫ້ທັນໂລກ ໃຫ້ຮຸ່ນລູກຫຼານເຮົາໄດ້ສຶກສາ ແລະ ນໍາເອົາບົດຮຽນດັ່ງກ່າວ ມາສືບທອດຕາມເຈດຕະນາອັນຖືກຕ້ອງ ຕາມພາວະວິໄສ.

• ເພື່ອເຮັດໃຫ້ການສຶກສາ ຄົ້ນຄວ້າຢູ່ພາຍໃນ ໄດ້ຮັບການສົ່ງເສີມ ໄດ້ຮັບການພັດທະນາຢ່າງບໍ່ຢຸດຢັ້ງ.
• ດ້ານວັນນະຄະດີ ເກົ່າແກ່ຈໍານວນຫຼວງຫຼາຍ ທີ່ຍັງບໍ່ທັນໄດ້ຮັບການເຜີຍແຜ່ ແລະ ສຶກສາ ຄົ້ນຄວ້າວິໄຈ.
• ສຸມໃສ່ການເຜີຍແຜ່ ແກ່ນັກຮຽນຮູ້ ຜູ້ທີ່ກໍາລັງສຶກສາຄົ້ນຄວ້າ ແລະສົ່ງເສີມ ນັກຄົ້ນຄວ້າທາງດ້ານ ວັນນະຄະດີ ພາສາປະຫວັດສາດ ແລະ ວັດທະນະທໍາລາວ ສາມາດເອກອ້າງໃນເວທີສາກົນ ແລະພາກພື້ນໄດ້.

ນອກຈາກນີ້ ມູນນິທິ ມະຫາ ສິລາ ວີຣະວົງ ນີ້ ຍັງສະໜັບສະໜູນດ້ານການສຶກສາ ແລະ ການຄົ້ນຄວ້າ ວັນນະຄະດີລາວ, ປະຫວັດສາດ ແລະ ພາສາ ອັນເປັນມໍລະດົກອັນລໍ້າຄ່າຂອງຊາດ; ຢາກໃຫ້ມີການສົ່ງເສີມ ເຜີຍແຜ່ ດ້ວຍຫຼາຍຮູບແບບ ເຊັ່ນຕັ້ງກອງປະຊຸມວິທະຍາສາດ ເພື່ອຄົ້ນຄ້ວາແລກປ່ຽນ ຄວາມຮູ້ ຄວາມສາມາດ ຜົນງານຕ່າງໆ ໃຫ້ນັກຮຽນ ນັກສຶກສາ ຕໍ່ວຽກງານມໍລະດົກວັດທະນະທໍາຂອງຊາດ, ເພື່ອເປັນການສືບທອດ ປົກປັກຮັກສາ ແລະ ເສີມຂະຫຍາຍມູນເຊື້້ອໃນດ້ານວັດທະນະທໍາຢ່າງມີວິທະຍາສາດ ທັນສະໄໝທັນໂລກ ໂດຍມີການກໍານົດເປົ້າໝາຍໃຫ້ຊັດເຈນເພື່ອໃຫ້ມູນນິທິ ມີທິດທາງແຜນການທີ່ແນ່ນອນ, ສ້າງຄວາມເຂົ້າໃຈໃຫ້ສັງຄົມ ໃນການເຂົ້າຮ່ວມກິດຈະກໍາດ້ວຍຄວາມສະໝັກໃຈ.